„Þannig var þetta bara“ : um Ágústu Pétursdóttur Snæland og raunveruleika kvenna í hönnun og listum.

Abstract

Í aldanna rás hafa konur verið minna metnar í listaheiminum á þeim forsendum að þær séu karlmönnum óæðri. Það er samt sem áður ekkert sem bendir til þess að karlmenn séu betri en konur í skapandi greinum. Í kjölfar réttindabaráttu kvenna í vestrænum heimi fór sýnileiki kvenna á sviði hönnunar og lista að aukast og almenn staða þeirra innan samfélagsins styrktist. Ágústa Pétursdóttir Snæland er talin vera fyrsti Íslendingurinn til þess að ljúka námi í grafískri hönnun. Ágústa teiknaði nokkur af þekktustu merkjum landsins og var hún ákaflega farsæl á sínum starfsferli. Hins vegar þurfti hún að hverfa frá störfum í rúma þrjá áratugi eftir að hún giftist til þess að hugsa um heimili og ala upp börn sín. Á þeim tíma þótti sjálfsagt fyrir konur að fórna sínum starfsframa fyrir heimilishald og fjölskyldu og nýttu fæstar konur, sem öfluðu sér listmenntunar á fyrri hluta 20. aldarinnar, menntun sína til starfs. Í þessari ritgerð verður farið lauslega yfir starfsferil Ágústu Pétursdóttur Snæland, ásamt því að skoðaður verður raunveruleiki kvenna í listum og hönnun og athugað hvers vegna lítið hefur farið fyrir þeim í sögunni.