Spjaldtölvur, málumhverfi nemenda og málstefna grunnskóla

Abstract

Samkvæmt Aðalnámskrá grunnskóla er skólum skylt að setja sér málstefnu og því kemur til ábyrgðar skóla og kennara að halda íslensku máli að nemendum sínum í öllu skólastarfi. Því er tilgangur þessa verkefnis að skoða hvernig skólar og kennarar líta á ábyrgð sína gagnvart íslenskri málstefnu í ljósi innleiðingar spjaldtölva í grunnskóla og hvaða áhrif hún hefur á málumhverfi nemenda. Ákveðið var að afla gagna í einum grunnskóla bæjarfélags þar sem spjaldtölvur hafa verið notaðar í kennslu frá því árið 2015. Spurningar voru lagðar fyrir skólastjóra og starfandi kennara skólans á unglingastigi varðandi málstefnu skólans og þeirra eigin málstefnu innan kennslustofunnar. Einnig var stafrænt umhverfi nemenda í spjaldtölvum skoðað sérstaklega. Í ljós kom að stjórnendur og kennarar skólans virtust ekki nægilega upplýstir um þá ábyrgð sem þeim ber að fylgja eftir samkvæmt opinberri málstefnu á Íslandi m.a. vegna þess að stafrænt umhverfi í spjaldtölvum nemenda var á ensku. Ákveðið andvara- eða hugsunarleysi skólastjóra og kennara virðist því vera gagnvart mikilvægi þess að námsumhverfi í spjaldtölvum þurfi að vera á íslensku. Vert er þó að nefna að þrátt fyrir að allt umhverfi spjaldtölvunnar sé á ensku er allt sem kemur frá kennurum og nemendum á íslensku. Þetta hefur því enn sem komið er frekar áhrif á form en stöðu íslenskunnar. Það skiptir miklu máli að hugsað sé til þess í innleiðingu spjaldtölva í skólastarf að skólinn velji spjaldtölvur sem bjóða upp á íslenskt notendaviðmót, þannig geta nemendur unnið í íslensku málumhverfi. Þetta verkefni er framlag í þeirri umræðu og er ætla að vekja athygli á ábyrgð skóla til að setja sér málstefnu, sérstaklega með tilliti til spjaldtölvuvæðingar, og stuðla að jákvæðu viðhorfi barna til íslenskunnar.