Allir eru með : félagsfærni og sjálfsmynd leikskólabarna í útinámi

Abstract

Ritgerð þessi er lokaverkefni mitt til B.Ed. gráðu í leikskólakennarafræði við Menntavísindasvið Háskóla Íslands. Ritgerðin fjallar um félagsfærni og sjálfsmynd leikskólabarna í útinámi. Markmiðið með ritgerðinni er að skoða á hvaða hátt útinám eflir félagsfærni og sjálfsmynd leikskólabarna og því er sett fram rannsóknarspurningin: Á hvaða hátt eflir útinám félagsfærni og sjálfsmynd leikskólabarna? Fjallað er um kenningar Lev Vygotsky og John Dewey og þær settar í samhengi við útinám. Þá eru skilgreiningar á útinámi skoðaðar ásamt hlutverki kennara í útinámi. Hugtökin félagsþroski, félagsfærni og sjálfsmynd eru skilgreind og sjónum beint að tækifærum útináms við eflingu þessara þroskaþátta. Félagsfærni og sjálfsmynd er stór þáttur í þroska barna á leikskólaárunum og mikilvægt fyrir leikskólakennara að vera vakandi fyrir tækifærum til að efla þessa þroskaþætti. Með þessu verkefni er vonast til að vekja áhuga og vitund meðal leikskólakennara um mikilvægi útináms í þróun sjálfsmyndar og félagsfærni leikskólabarna.