Útinám og hreyfing : samþætting íslenskukennslu og hreyfingar í útinámi

Abstract

Lokaverkefni mitt er til B.Ed.-prófs í grunnskólakennarafræði við Menntavísindasvið Háskóla Íslands. Markmiðið með þessu verkefni er að skoða mikilvægi og kosti útikennslu eða útináms með áherslu á hreyfingu, umfjöllun um kennslu og samþættingu námsgreina í útinámi. Einnig er að finna í verkefninu verkefnabanka með hugmyndum að íslenskuverkefnum til þess að vinna með nemendum á yngsta stigi grunnskóla í útinámi með áherslu á hreyfingu þeirra. Verkefnin í verkefnabankanum eru valin út frá hæfniviðmiðum fyrir íslensku samkvæmt Aðalnámskrá grunnskóla. Í útinámi er erfitt að komast hjá því að samþætta ekki námsgreinar. Íslenska er ein af mörgum námsgreinum sem hægt er að færa kennslu út úr hefðbundinni kennslustofu og tilvalin til að samþætta við hreyfingu en í útinámi er hreyfing oft í fyrirrúmi. Bæði hefur útivera góð áhrif á líðan og nám barna en úti eykst hreyfing þeirra. Í íslensku læra nemendur mikilvægi lesturs og læsis, málfræði og ritun, svo eitthvað sé nefnt og vegna þess eru verkefnin í verkefnabankanum valin með það í huga. Útinám býður upp á fjölbreytileika í starfi og hentar vel fyrir skólastarf og nám nemenda. Einnig eykur útinám hreyfingu nemenda og veitir góða útiveru.