Æskuár ömmu Helenar. Fortíð skoðuð með augum nútímans

Abstract

Æskuminningar Helenar Þorkelsson eru lagðar fram sem meistaraverkefni í ritlist við Háskóla Íslands. Helen fæddist 4. júlí árið 1940 á Siglufirði og er móðuramma höfundar. Minningarnar eru skoðaðar með augum nútímans og tala fortíð og nútíð saman í gegnum verkið.Jóhann Þorkelsson héraðslæknir og kona hans, hin danska frú Agnete Brinck-Claussen tóku Helen í fóstur til Akureyrar eftir mörg barnlaus ár saman. Þegar Helen varð þriggja ára eignuðust hjónin síðan dóttur með Downs-heilkenni, Sólveigu.Æska Helenar einkennist af árekstrum innan heimilisins, harðræði sem börn og fullorðnir beittu hina fötluðu systur hennar og erfiðleikum við að finna sinn stað í lífinu. Á þeim áttatíu árum sem hafa liðið síðan þá hefur íslenskt samfélag tekið miklum breytingum og Helen elst upp þegar gömlu gildin eru enn allsráðandi. Með það í huga er áhugavert og fræðandi að lesa um upplifanir og reynslu manneskju sem tilheyrir einni síðustu kynslóð gamla Íslands.