Styrkleikar og veikleikar fyrirtækjamenningar í kjölfar samruna

Abstract

Fyrirtækjamenning vísar til þeirra viðmiða, gilda og undirliggjandi forsendna sem hafa áhrif á rekstur og stjórnarhætti fyrirtækja. Fjöldi fyrirtækja taka þá ákvörðun að sameinast eða yfirtaka önnur fyrirtæki í þeirri von að auka samkeppnisforskot þrátt fyrir að hátt hlutfall samruna og yfirtaka mistakist. Talið er að 20 til 70% samruna og yfirtaka mistakist eftir því hvernig árangurinn er skilgreindur. Menningarárekstur er viðurkenndur áhrifaþáttur þegar kemur að árangri í samrunum og yfirtökum. Sökum þess hefur aukin áhersla verið lögð á mikilvægi menningar í samþættingarferlinu að samruna eða yfirtöku lokinni. Ný sameiginleg fyrirtækjamenning í upphafi sameiningar getur flýtt fyrir samþættingu og skapað sterkari menningu til lengri tíma litið. Markmið rannsóknar var að varpa ljósi á styrkleika og veikleika fyrirtækjamenningar Festi ásamt því að kanna hvort munur væri á viðhorfi starfsmanna Festi til fyrirtækjamenningar og frammistöðu eftir kyni, aldri, starfsaldri og stöðu. Einnig var rannsókn ætlað að varpa ljósi á samanburð á styrkleikum og veikleikum fyrirtækjamenninga dótturfélaga Festi ásamt einingunni Festi skrifstofu. Þá var einnig kannað hvort munur væri á viðhorfi starfsmanna til frammistöðu fyrirtækjanna. Í fræðilega hlutanum var fjallað um fyrirtækjamenningu, samruna og fyrirtækjamenningu í samruna. Einnig var fjallað um samruna N1 og Festi, fyrirtækin sem um ræðir og mælitæki rannsóknar. Framkvæmd var megindleg rannsókn þar sem rafrænn spurningalisti kenndur við Denison (e. Denison Organizational Culture Survey) var sendur á starfsmenn fyrirtækjanna.