MINILOOP. Viðskiptaáætlun

Abstract

Ritgerð þessi er viðskiptaáætlun fyrir fyrirtæki sem hefur fengið vinnuheitið MINILOOP, sem er fyrirtæki er mun sérhæfa sig í samnýtingu á fatnaði fyrir börn frá fæðingu til þriggja ára aldurs. Áætlunin er gerð til að fá innsýn í hvort hugmyndin sé vænleg til reksturs og hvort fyrirtækið geti orðið arðbært.Hjá MINILOOP verður hægt að vera í áskrift á barnafötum í stærðum 44 til 98. Á fyrstu tveimur árum í rekstri verður miðað við að einungis verði byrjað með stærðir 44 til 80 eða fyrir börn á aldrinum 0 til 18 mánaða. Áætlunin sýnir fram á hvernig rekstrinum muni hagað fyrstu þrjú árin, frá undirbúningsvinnu í fyrirtæki í rekstri. MINILOOP er umfangsmikill rekstur sem krefst mikils fjármagns. Stofnandi mun þurfa að leita á náðir fjárfesta við að koma rekstrinum á koppinn.Þjónustan mun fara fram á þann hátt að einstaklingar skrá sig í áskrift á fötnunum. Þeir velja þá stærð sem að barnið er í og fá senda pakka með annað hvort 15 eða 30 flíkum en það magn miðast við hálfan og heilan fataskáp barns í hverri stærð. Þegar barnið er að vaxa upp úr fötunum má panta næstu stærð, fá hana senda og hafa 4 virka daga til að skila hinum pakkanum öllum. Einstaklingar borga fast verð á mánuði fyrir þjónustuna en henni verður hægt að segja upp fyrirvaralaust.Þjónustan fer að mestu fram í gegnum heimasíðu fyrirtækisins, innheimta fer fram rafrænt og haldið er utan um birgðastöðu í sérstöku forriti sem heldur utan um hvar hver flík er hverju sinni.Fyrirtækið er umhverfisvænt fyrirtæki sem vinnur að því að draga úr sóun á fatnaði og stuðla að samnýtingu fjölskyldna á auðveldan og hagkvæman hátt fyrir fjölskyldur í íslensku samfélagi.Höfundur telur sig hafa öðlast nægilega reynsu og þekkingu í námi til að geta stofnað og rekið fyrirtækið.