Þátttaka barna í forsjármálum með tilliti til 12. gr. barnasáttmála Sameinuðu þjóðanna

Abstract

Réttindi barna hafa alltaf verið í deiglunni, en þó aldrei meira en þau hafa verið í samfélagsumræðunni undanfarin ár. Áður fyrr var það að mörgu leyti óþekkt að barn hefði yfirhöfuð sjálfstæð réttindi. Börn voru lengi vel jaðarsettur hópur vegna þess að þau voru minni máttar í augum laganna. Þau voru svo gott sem valdalaus og var aðeins tekið tillit til þeirra vegna góðvildar þeirra manna sem ákváðu sjálfstætt að taka upp málstað þeirra. Það var svo fyrst á síðari hluta 20. aldar sem viðhorf samfélagsins til barna tók miklum stakkaskiptum frá tímum seinni heimstyrjaldarinnar. Staða barna í samfélaginu varð önnur og ríkjandi hugarfar einkenndist af því að æskuárin væru sérstaklega mikilvægt tímabil í þroska hvers einstaklings.Í þessari ritgerð verður leitast eftir því að skoða þátttöku barna í ákvörðunum um forsjá hér á landi. Fjallað verður um 12. gr. barnasáttmála Sameinuðu þjóðanna og hvort íslensk lög samræmist þeirri grein, ásamt dómaframkvæmd að einhverju leyti. Þá verður verður frumvarp til laga um breytingu á barnalögum nr. 76/2003 skoðað og sér í lagi hvort það samræmist réttindum barna samkvæmt 12. gr. barnasáttmálans.