Er kjötið á disknum vinur eða matur? Ýmsar hliðar kjötáts

Abstract

Í þessari ritgerð verður sjónum beitt að kjötneyslu en helsta áherslan verður lögð á að útskýra hvers vegna það ætti ekki að borða dýr. Notast verður við mannfræðileg hugtök til þess að skýra hvernig menning skiptir sköpum þegar talað er um kjöt. Rýnt verður í kenningar sem útskýra menningarlegan mun en einnig verður rýnt í þá fordóma sem hafa komið til vegna ólíkra menningarsvæða og þ.a.l. ólíkrar sýnar á kjötát. Reynt verður að útskýra fyrir lesendum hvers vegna það er í raun enginn munur á því að borða svín og að borða hunda. Gæludýrahald verður skoðað og mikilvægi þess fyrir manninn en einnig verða skoðaðar dýrategundir sem ekki falla undir húsdýr en eru alin upp til manneldis á sumum menningarsvæðum. Einnig verður farið yfir þær umhverfislegu hliðar sem fylgja kjötáti og sýnt fram á þær afleiðingar sem búfjárhald og verksmiðjubúskapur hafa á loftslagsbreytingar. Jafnramt verður farið yfir siðferðislegar hliðar kjötáts og hvernig manneskjan upplifir ákveðna kjötþversögn (e. meat paradox) þegar hún borðar kjöt af tilteknum dýrategundum en ekki öðrum. Niðurstöður ritgerðarinnar eru þær að neysla á dýraafurðum er óþörf fyrir þá einstaklinga sem hafa tök á því að borða annan mat. Ritgerðin ætti því að fá lesendur til þess að leiða hugann að því að hætta að borða kjöt og sjá fyrir sér breytta framtíð þar sem einungis gervikjöt verður í boði fyrir þá sem á annað borð vilja borða kjöt.