Hlutabréfaverð Icelandair 2017 til 2021: Hvernig hefur hlutabréfaverð Icelandair Group þróast í samanburði við önnur flugfélög á tímum áfalla vegna Covid-19 og innköllunar Max 737-8 flugvéla?

Abstract

Í þessari lokaritgerð um verðþróun Icelandair Group á árunum 2017 til 2021 er leitast við að svara spurningunni Hefur hlutabréfaverð Icelandair Group þróast í samanburði við önnur flugfélög á tímum áfalla vegna Covid-19 og innköllunar Max 737-8 flugvéla ? Til þess að svara spurningunni er meðal annars farið yfir dótturfélög félagsins, sögu þeirra á hlutabréfmarkaði og félagið borið saman við önnur alþjóðleg flugfélög sem eiga það sameiginlegt að vera með Boeing MAX 737-8 flugvélar í rekstri. Í fjórða kafla ritgerðarinnar er svo farið yfir marktækar verðbreytingar sem metnar voru með Bollinger böndum og reynt að skýra þær með rökstuddum hætti. Helstu niðurstöður eru að hlutabréfaverð Icelandair er ekki í líkingu við flugfélögin sem notuð voru til samanburðar og er í öllum tilfellum verri fjárfesting þegar horft er yfir umtalað tímabil. Þróun félagsins hefur verið neikvæð frá ársbyrjun 2017 og hefur hlutabréfaverð lækkað um 94,21%. Þó má rekja þá lækkun til fleiri atburða en Covid-19 og kyrrsetningar Boeing MAX 737-8 flugvéla, eins og til dæmis til hækkunar á olíuverði og mikillar samkeppni á markaðnum. Tvær mikilvægar ályktanir eru dregnar út frá niðurstöðum. Í fyrsta lagi eru þýðingarmiklar verðbreytingar skyndilegar og koma fram í kjölfar ófyrirsjáanlegra atburða og við birtingu nýrra upplýsinga um afkomu frá félaginu. Í öðru lagi er markaðurinn hálfsjálfvirkur samkvæmt kenningunni um skilvirkra markaði.