Dauðaósk Elía spámanns (1Kon 19.4). Saga Elía skoðuð í ljósi ritskýringar, áhrifasögu og nútímakenninga um þunglyndi

Abstract

Þessi ritgerð fjallar um Elía spámann með nokkuð nýstárlegum hætti. Fjallað er um bakgrunn hans og helstu heimildir auk þess sem persónugerð hans er skoðuð nánar og spámannleg einkenni sem hann kann að bera. Einnig eru hér skoðaðar aðrar heimildir um Elía, hvernig hann birtist í öðrum trúarbrögðum og skoðuð nokkur dæmi um hvaða áhrif spámaðurinn hefur haft á síðari tíma. Í seinni hluta ritgerðarinnar er Elía skoðaður út frá sjónarhóli sálfræðinnar og grafið er dýpra í eyðimerkurgöngu spámannsins í Fyrri konungabók 19.4–14. Þá er persóna Elía rannsökuð með hliðsjón af einkennum sjúkdómsins þunglyndi og er sögupersóna Elía látin taka „þunglyndispróf Becks“. Niðurstaðan er sú að greina má talsverð og jafnvel mikil einkenni þunglyndis hjá sögupersónunni Elía.