is Íslenska en English

Lokaverkefni (Meistara)

Háskóli Íslands > Heilbrigðisvísindasvið > Meistaraprófsritgerðir - Heilbrigðisvísindasvið >

Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/37895

Titill: 
  • Spítalasýkingar tengdar inniliggjandi þvagleggjum: Hjúkrunarmeðferð, á hverju hún byggir og þættir sem hindra notkun hennar
Námsstig: 
  • Meistara
Efnisorð: 
Útdráttur: 
  • Bakgrunnur: Of margir sjúklingar fá spítalasýkingu tengda notkun á þvagleggjum á meðan þeir dvelja á spítala. Hjúkrunarfræðingar eru í lykilstöðu til að draga úr þvagleggstengdum þvagfærasýkingum með því að nota hjúkrunarmeðferð sem byggir á gagnreyndri þekkingu. Enn er notast við hjúkrunarmeðferð sem ekki er byggð á gagnreyndri þekkingu, þrátt fyrir að endurtekið hafi verið sýnt fram á að notkun gagnreyndrar þekkingar bæti gæði hjúkrunar. Margir hindrandi þættir hafa hér áhrif en mikilvægt er að greina þessa þætti svo að hægt sé að finna viðeigandi lausnir. Spítalasýkingar eru ekki aðeins kostnaðarsamar fyrir heilbrigðiskerfið heldur hafa þær einnig mikil áhrif á sjúklinga og valda þeim auknum þjáningum og alvarlegri veikindum. Því er mikill ávinningur fyrir sjúklinga og heilbrigðiskerfið að efla notkun gagnreyndrar hjúkrunar og lágmarka spítalasýkingar tengdar notkun þvagleggja.
    Tilgangur: Tilgangur þessarar fræðilegu samantektar er að greina hjúkrunarmeðferð sem dregur úr hlutfalli þvagfærasýkinga tengdum notkun inniliggjandi þvagleggja í þvagrás (e. catheter aquired urinary tract infection, CAUTI), á hverju meðferðin byggir og hvaða þættir hindra hjúkrunarfræðinga í að nota gagnreynda hjúkrun í tengslum við notkun og meðhöndlun þvagleggja.
    Aðferðir: Í þessu verkefni var notuð fræðileg samantekt með kögunarsniði. Notast var við leiðbeiningar Joanna Briggs stofnunarinnar, fimm þrepa kögunarsniðs ramma Arksey og O’Malley og PRISMA-ScR. Leitað var að greinum í gagnasöfnunum PubMed og Cinahl ásamt handvirkri leit í hjúkrunartímaritum og heimildalistum. Greinarnar voru allar birtar á árunum 2015 til 2020. Sett voru fram valviðmið sem greinarnar þurftu að standast og voru greinarnar metnar af tveimur matsaðilum.
    Niðurstöður: Upphafsleit skilaði 617 heimildum en tölfræðilega marktækar niðurstöður úr 17 greinum sem uppfylltu inntökuskilyrði voru settar upp í fylki og samþættar lárétt og lóðrétt. Niðurstöður samantektarinnar benda til þess að mismunandi hjúkrunarmeðferð geti dregið úr hlutfalli þvagfærasýkinga tengdri þvagleggjanotkun og að fræðsla, hjúkrunarstýrt verklag og daglegt endurmat á ábendingu fyrir þvaglegg séu þær íhlutanir sem oftast voru notaðar gegn þvagfærasýkingum. Í flestum tilvikum var hjúkrunarmeðferðin byggð á gagnreyndri þekkingu. Niðustöður benda einnig til þess að ýmsar hindranir geti dregið úr notkun hjúkrunarfræðinga á gagnreyndri hjúkrunarmeðferð. Meginþemu hindrananna voru 1) auðlindir og álag, 2) starfsumhverfi og menning, 3) viðhorf, 4) þekking og 5) ákvarðanataka. Skortur á auðlindum, tíma og hjúkrunarstjórnun voru þeir þættir sem flestar rannsóknirnar bentu á að gæti dregið úr notkun hjúkrunarfræðinga á gagnreyndri hjúkrun.
    Ályktun: Fleiri en ein hjúkrunarmeðferð sýnir góðan árangur til að draga úr hlutfalli CAUTI. Við kjör aðstæður má með notkun samsettrar hjúkrunarmeðferðar sem byggð er á gagnreyndri hjúkrun draga úr fjölda þvagfærasýkinga á hverja 1.000 þvagleggsdaga um 28% til 96%. En til þess að slíkur árangur náist þurfa margir þættir að ganga upp samtímis. Stjórnendur og starfumhverfi þurfa að styðja við hjúkrunarmeðferðina og starfsfólkið þarf að vera móttækilegt og vilja nota hana. Hjúkrunarfræðingar geta með jákvæðu viðhorfi, auknu umboði til athafna, þekkingu og stuðningi stjórnenda, dregið úr tíðni CAUTI á spítölum og þannig aukið gæði og öryggi þjónustunnar. Frekari rannsókna er þörf á gagnreyndri hjúkrunarmeðferð sem dregur úr CAUTI og hvaða þættir það eru hjá starfsfólki, stjórnendum og stofnunum sem hvetja og hindra notkun gagnreyndrar hjúkrunar.
    Lykilorð: Þvagfærasýking, þvagleggjanotkun, hjúkrunarmeðferð, gagnreynd hjúkrun, hjúkrunarstjórnun

Samþykkt: 
  • 4.5.2021
URI: 
  • http://hdl.handle.net/1946/37895


Skrár
Skráarnafn Stærð AðgangurLýsingSkráartegund 
Skilaútgáfa MS verkefni.pdf1.06 MBOpinnHeildartextiPDFSkoða/Opna
Skemman_yfirlysing.pdf193.96 kBLokaðurYfirlýsingPDF