is Íslenska en English

Lokaverkefni (Meistara)

Háskóli Íslands > Heilbrigðisvísindasvið > Meistaraprófsritgerðir - Heilbrigðisvísindasvið >

Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/37908

Titill: 
  • Tíðni eðlilegra fæðinga á Landspítala fyrir og eftir sameiningu fæðingardeilda: Afturvirk ferilrannsókn
Námsstig: 
  • Meistara
Efnisorð: 
Útdráttur: 
  • Bakgrunnur: Þann 1. mars 2014 var gerð breyting á skipulagi fæðingarþjónustu á Landspítala með sameiningu fæðingardeildar Landspítala, sem sinnti bæði hraustum konum og konum með áhættuþætti, og fæðingarhluta Hreiðursins sem var ljósmæðrastýrð eining fyrir hraustar konur í eðlilegri fæðingu. Við sameiningu var farið í ýmsar mótvægisaðgerðir til að vernda eðlilegar fæðingar en vitað var að ákveðin hætta væri á smiti úr áhættuumhverfi yfir í það eðlilega. Staðinn var vörður um yfirsetu ljósmæðra, markvisst var dregið úr óþarfa inngripum með breyttu verklagi og endurmenntun starfsfólks ásamt því að reglulegar árangursmælingar um inngrip og tíðni eðlilegra fæðinga voru gerðar.
    Tilgangur: Tilgangur rannsóknarinnar var að meta hvort markmiðum sameiningarinnar hafi verið náð varðandi það að vernda eðlilegar fæðingar og styðja þannig við frekari þróun þjónustu fæðingarvaktar Landspítala við þá ólíku hópa kvenna sem þangað leita.
    Aðferðir: Um afturskyggna ferilrannsókn er að ræða á öllu þýði kvenna í rafrænni, íslenskri fæðingarskráningu sem fæddu einbura á fæðingardeildum Landspítala á tveimur tveggja ára tímabilum, fyrir og eftir sameiningu, eða árin 2012-2013 og 2015-2016. Aðalútkoma var leiðrétt fyrir áhrifabreytum í lógistískri aðhvarfsgreiningu en aðrar breytur voru skoðaðar með lýsandi tölfræði, t-prófum og kí-kvaðratprófum.
    Niðurstöður: Tíðni eðlilegra fæðinga, bæði án belgjarofs og með mögulegu belgjarofi, jókst marktækt eftir sameiningu fæðingardeilda Landspítala. Marktækt dró úr tíðni belgjarofs í fæðingu, hríðarörvunar með oxytocin og spangarklippingum. Jafnframt dró marktækt úr notkun utanbastsdeyfingar, eftir sameiningu, en munurinn var ekki marktækur þegar aðeins sjálfkrafa sótt var skoðuð. Hins vegar jókst tíðni framköllunar fæðingar marktækt eftir sameiningu. Ekki var marktækur munur á tíðni 5 mínútna Apgarstiga undir 7.
    Ályktanir: Út frá niðurstöðum þessarar rannsóknar er ljóst að hægt er að auka tíðni eðlilegra fæðinga á þverfæðilegum fæðingardeildum með markvissum aðgerðum. Nauðsynlegt er þó að vera áfram vakandi fyrir áhrifum áhættuumhverfis á eðlilegar fæðingar til að viðhalda þeim árangri sem náðst hefur.
    Lykilorð: eðlileg fæðing, fæðingarstaður, útkoma fæðinga, vinnustaðamenning, ljósmóðurfræði, áhætta

Samþykkt: 
  • 4.5.2021
URI: 
  • http://hdl.handle.net/1946/37908


Skrár
Skráarnafn Stærð AðgangurLýsingSkráartegund 
Yfirlýsing um meðferð lokaverkefna.pdf237.42 kBLokaðurYfirlýsingPDF
Tíðni eðlilegra fæðinga fyrir og eftir sameiningu fæðingardeilda.pdf755.22 kBLokaður til...19.06.2021HeildartextiPDF