Velferð dýra í lagarými. Vangaveltur um stöðu dýra í heimi mannsins

Abstract

Markmið þessarar meistararitgerðar er að skoða hvaða hlutverk lögin gætu haft í mótun framtíðarstefnu í málefnum dýra með vernd þeirra og réttindi í huga. Reynt er að skyggnast undir yfirborð nútíma löggjafar og koma auga á þá heimsmynd sem liggur að baki lögunum eins og þau eru í dag. Sú heimsmynd er byggð á fastmótaðri verufræði sem byggir á tvíhyggju og stigskiptingu lífs þar sem maðurinn er alltaf í miðpunkti. Ráðist er í róttæka endurskoðun á þessu fastmótaða hugmyndakerfi og leitað í smiðju ýmissa samtímahugsuða sem hafa m.a. lagt til einhyggju og pósthúmaníska sýn á stöðu dýra í heimi mannsins. Hugmyndir Andreas Philippopoulos-Mihalopoulos eru kynntar ítarlega og einkum byggt á bók hans Spatial Justice – Body, Lawscape, Atmosphere frá árinu 2015. Hugmyndaheimurinn sem þar kemur fram er á margan hátt nýstárlegur og skapar tækifæri til að skoða áherslur í dýravernd og lög um velferð dýra frá öðru sjónarhorni en hinn hefðbundna heimsýn býður upp á. Sérstök áhersla er lögð á markmiðsákvæði 1. gr. laga um velferð dýra nr. 55/2013 til að greina hvaða hugmyndir og viðhorf liggja að baki lögunum. Í framhaldinu er skoðað hvaða leiðir væru færar til að lögin endurspegli frekar þá sýn sem endurskoðun og gagnrýni hefur veitt.