Besti staður á jarðríki? Um frásagnaraðferð og viðhorf í bókinni, Vertu ósýnilegur: Flóttasaga Ishmaels, eftir Kristínu Helgu Gunnarsdóttur

Abstract

Bókin Vertu ósýnilegur: Flóttasaga Ishmaels (2017) eftir Kristínu Helgu Gunnarsdóttur er til umfjöllunar í þessari ritgerð. Aðalpersónur bókarinnar eru börn, Ishmael og Salma sem þurfa, ásamt fjölskyldum sínum að flýja stríðsástand í heimalandi sínu, Sýrlandi. Sagan af börnunum tveimur endar á Íslandi þar sem þau sameinast og geta haldið áfram lífi sínu. Saga þeirra er flóttasaga af ólíkum toga því að Ishmael neyðist til að ferðast á eigin vegum, stundum ólöglega með aðstoð glæpamanna, en Salma og fjölskylda hennar fá hæli hérlendis sem kvótaflóttamenn. Hér verður fjallað um frásagnaraðferð bókarinnar og textinn skoðaður með það að markmiði að kanna hvort að greina megi óríentalíska orðræðu innan verksins. Þá verður litið til þess hvort sjá megi innan textans tengsl við hugmyndir Salman Rushdie um að minningar frá heimalandi geti haft áhrif á mótun sjálfsmyndar. Að lokum er fjallað um hvort í frásögninni megi greina boðskap eða viðhorf til ákveðinna málaflokka innan verksins.