is Íslenska en English

Lokaverkefni (Bakkalár)

Háskóli Íslands > Félagsvísindasvið > B.A./B.Ed./B.S. verkefni - Félagsvísindasvið >

Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/38213

Titill: 
  • Stjórnunaraðferðir og persónueiginleikar ungra árangursríkra stjórnenda.
Námsstig: 
  • Bakkalár
Útdráttur: 
  • Tilgangur rannsóknarinnar var að varpa ljósi á hvaða stjórnunaraðferðir og persónueiginleikar skili árangri í starfi að mati ungra stjórnenda sem náð hafa miklum árangri í íslensku viðskiptalífi og hvort fram komi sýnilegur munur eftir kyni og aldri stjórnenda.
    ,,Það er eitt sem er öruggt þegar út í atvinnulífið er komið, annað hvort verður þú stjórnandi, eða þér verður stjórnað. Þess vegna er mjög mikilvægt að skilja hvað felst í því að vera stjórnandi, hvernig er hægt að ná árangri og verða góður stjórnandi og leiðtogi“ (Ásta Dís Óladóttir, munnleg heimild, 12. apríl 2021). Höfundur vonast því eftir að niðurstöður þessarar rannsóknar geti nýst ungu fólki sem er að stíga sín fyrstu skref á vinnumarkaði eftir háskólanám og stefnir á stjórnunarstöður. Markmiðið var að stjórnendur framtíðarinnar geti mögulega tileinkað sér þá stjórnunarhætti og eiginleika sem ungir árangursríkir stjórnendur hafa tileinkað sér til að ná árangri við að komast í æðstu stjórnunarstöður. Einnig að eldri og reynslumeiri stjórnendur geti nýtt sér niðurstöðurnar til að fá innsýn inn í árangursríkar stjórnunaraðferðir og persónueiginleika frá sjónarhorni ungra stjórnenda sem náð hafa árangri. Loks að niðurstöður verði hvatning til frekari rannsókna á þessu sviði. Rannsóknarspurningarnar sem settar voru fram eru: Hvaða stjórnunaraðferðum hafa ungir árangursríkir stjórnendur beitt og hvaða persónueiginleikum eru þeir gæddir? Er munur á stjórnendum eftir kyni þeirra og aldri?
    Eigindlegri aðferðafræði var beitt í rannsókninni til þess að leita svara við rannsóknarspurningunum. Stuðst var við aðferðafræði grundaðrar kenningar þar sem rannsakandi lagði áherslu á að fá innsýn í reynslu og upplifun þátttakenda. Alls voru tekin sex viðtöl við bæði konur og karla í stjórnunarstöðu í fyrirtækjum og stofnunum hér á landi. Þátttakendur áttu það sameiginlegt að vera efnilegir stjórnendur undir fertugt. Við greiningu gagnanna komu fjögur þemu í ljós. Þau voru: Félagsleg færni, auðmýkt, traust og samvinna, drifkraftur og almenn þekking. Undir þemanu „Félagsleg færni“ voru flokkarnir „Færni í að stýra og virkja fjölbreytileika“ og hins vegar ,,Að ná fram því besta í hverjum og einum“.
    Helstu niðurstöður rannsóknar voru þær að þátttakendur töldu árangursríkast að beita mismunandi stjórnunaraðferðum eftir fólki og aðstæðum hverju sinni þannig að hægt væri að ná því besta fram hjá hverjum og einum. Jafnframt gáfu svör þeirra vísbendingar um að munur væri á stjórnunarháttum eftir aldri en minni munur sást eftir kynjum. Þá töldu ungu stjórnendurnir afar mikilvægt að virkja fjölbreytileikann innan skipulagsheilda til þess að ná fram sem flestum sjónarmiðum og virkja ólíka einstaklinga í átt að sameiginlegu markmiði. Lykilpersónueiginleiki árangursríks stjórnanda að mati þátttakenda var að viðkomandi væri fær í mannlegum samskiptum. Þá þyrfti hann einnig að hafa víðtæka þekkingu á málefnum skipulagsheildarinnar, vera opin og deila upplýsingum og bera traust til fólks. Þá væri nauðsynlegt að sýna auðmýkt en vera jafnframt með sjálfstraust og sterka trú á sjálfum sér og brennandi löngun til að ná árangri með teyminu.

Samþykkt: 
  • 7.5.2021
URI: 
  • http://hdl.handle.net/1946/38213


Skrár
Skráarnafn Stærð AðgangurLýsingSkráartegund 
BSritgerð_SaraValgerdurJuliusdottir..pdf902.43 kBLokaður til...06.05.2024HeildartextiPDF
Yfirlýsing um meðferð lokaverkefna..pdf63.15 kBLokaðurYfirlýsingPDF