Rafkróna. Innleiðing rafrænnar myntar á Íslandi með hliðsjón af fyrirætlan sænskra yfirvalda um upptöku rafmyntar þar í landi fyrir 2023

Abstract

Í þessu lokaverkefni verður fjallað um mögulega rafvæðingu reiðufjár á Íslandi. Seðlabankar hafa verið til í mörg hundruð ár og hefur eitt meginhlutverk þeirra verið að láta almenningi í té traustverða peninga. Óskert aðgengi að traustverðum peningum er almennt talið auka almannaheill. Hins vegar er heimurinn að breytast. Notkun reiðufjár í viðskiptum hefur minnkað í mörgum háþróuðum löndum. Ástæður sem liggja þar að baki eru m.a. miklar framfarir í stafrænni tækni sem hafa leitt af sér mikið magn af fjölbreyttum, hraðvirkum og skilvirkum greiðslulausnum. Tilkoma svokallaðrar grunnkeðjutækni (e. distributed ledger technology) og útgáfa gjaldmiðla sem byggja á henni hefur einnig spilað inn í. Að auki er talið að kórónuveirufaraldurinn, sem nú gengur yfir heimsbyggðina, hafi einnig ýtt undir minni notkun reiðfjár. Til þess að standa vörð um hlutverk sitt að viðhalda efnahagslegum stöðugleika og til að tryggja almenningi áframhaldandi aðgang að traustverðum peningum hafa seðlabankar víða um heim beint sjónum sínum að mögulegri rafvæðingu reiðufjár. Í tilfelli Seðlabanka Íslands með svokallaðri rafkrónu.