Fyrirbærafræði samspils hugar og líkama í ljósi kenninga Merleau-Ponty og með hliðsjón af þjálfun íþróttamanna

Abstract

Í ritgerðinni er fjallað um samspil hugar og líkama og upplifun mannsins á heiminum. Bornar eru saman kenningar René Descartes og Maurice Merleau-Ponty um huga og líkama. Fyrst eru tvíhyggjukenningar Descartes um eðli heimsins reifaðar og gagnrýni á þær. Síðan eru kenningar efnishyggju og verkhyggju um huga og líkama skoðaðar og vandamál við þær. Því næst eru einnig reifaðar kenningar Merleau-Ponty og fyrirbærafræði, um samband hugar og líkama. Tekin er fyrir hugmynd um líkamsgreind með dæmum af íþróttafólki og færð eru rök fyrir því, með hliðsjón af þjálfun íþróttamanna, að hugur og líkami vinni saman. Gefin eru dæmi um æfingar sem hægt er að iðka til þess að styrkja samband hugar og líkama. Að lokum eru færð rök fyrir því að fyrirbærafræði sé ákjósanleg til þess að öðlast frekari þekkingu á samspili hugar og líkama með samstarfi sínu við vitsmunavísindi.