Starfsánægja starfsmanna Veltis : hvaða þættir hafa áhrif?

Abstract

Markmið rannsóknarinnar var að draga fram og greina viðurkennda áhrifaþætti til þess að kanna hvort þeir hafi áhrif á starfsánægju og hvatningu. Sérstök áhersla var lögð á að rannsaka tengingu hlutlægra og huglægra þátta við starfsánægju. Rannsóknarspurningin sem sett var fram í inngangskafla ritgerðarinnar er: Hvaða þættir hafa áhrif á starfsánægju starfsmanna Veltis? Fræðileg umfjöllun einblíndi á kenningar ásamt helstu áhrifaþáttum sem hafa komið fram um hvatningu og starfsánægju. Notast var við tilviksrannsókn þar sem einungis var verið að rannsaka starfsánægju hjá einu fyrirtæki. Rannsókn þessi var gerð í samstarfi við starfsmenn fyrirtækisins Veltis. Í heildina gefa niðurstöður þessarar rannsóknar til kynna að starfsmenn Veltis séu almennt ánægðir í starfi. Niðurstöður rannsóknarspurningarinnar leiddu í ljós að fá að takast á við krefjandi verkefni, þjálfun og fræðsla, starfsandi, samskipti við yfirmenn og hrós og viðurkenning virðast hafa áhrif á starfsánægju starfsmanna Veltis. Niðurstöður rannsóknarinnar endurspegla fræðina að því leiti að ofangreindir þættir eru taldir hafa jákvæð áhrif á starfsánægju. Rannsókn þessi getur verið nytsamleg sem viðmið fyrir rannsóknir um starfsánægju hjá öðrum fyrirtækjum. Mikilvægt er þó að hafa í huga að áhrifaþættir starfsánægju eru ólíkir og fara oftar en ekki eftir þörfum og væntingum hvers og eins til starfs síns. Efnisorð: Starfsánægja, áhrifaþættir, hvatning, líðan starfsfólks