Áhrif stafvæðingar á þjónustu hins opinbera

Abstract

Megintilgangur þessarar rannsóknar var að greina hvaða áhrif stafvæðing hefur á þjónustu hins opinbera með því að rannsaka áhrif stafvæðingar á þinglýsingar hjá sýslumanninum á höfuðborgarsvæðinu. Stafvæðing snýst um að koma handvirkum ferlum á rafrænt form svo hægt sé að veita betri, hraðari og ódýrari þjónustu. Rannsakandi hafði samband við erlenda og innlenda sérfræðinga í stafvæðingu sem og fagstétt sem verður fyrir stafvæðingu þjónustu hins opinbera. Einn af viðmælendum er Anett Numa, stafrænn umbreytingarráðgjafi hjá e-Estonia í Eistlandi, eitt fremsta ríki heims þegar kemur að stafvæðingu þjónustu hins opinbera.Niðurstöður rannsóknarinnar gáfu til kynna að jákvæðar breytingar muni eiga sér stað á þjónustu hins opinbera í kjölfar stafvæðingar þess. Fjórar staðhæfingar voru rannsakaðar sem leiddu í ljós að stafvæðing þjónustu hins opinbera hefði líklega jákvæð áhrif á þjónustuupplifun beiðenda, myndi leiða til sparnaðar fyrir almenning, fagstéttir og hið opinbera, hafa áhrif á vinnumarkað og draga úr umhverfisáhrifum þjónustu hins opinbera.