Ávöxtunarkrafa líftæknifyrirtækja

Abstract

Markmið ritgerðarinnar var að skoða ávöxtunarkröfu líftæknifyrirtækisins Alvotech, á Íslandi og í Bandaríkjunum. Notast var við CAPM líkanið til þess að bera ávöxtunarkröfuna saman við önnur líftæknifyrirtæki í NBI vísitölunni auk fyrirtækja í öðrum atvinnugreinum. Einnig var rannsakað innri ávöxtunarkrafa lyfjafyrirtækisins Abbvie við sölu á líftæknilyfinu Humira meðan einkaleyfi stóð yfir og mögulega lækkun innri ávöxtunarkröfu eftir fyrningu þess. Til þess var notast við meðaltal framlegðarhlutfall líftæknifyrirtækja síðastliðin 7 ár, heildartekjur Abbvie af lyfinu Humira og að lokum miðgildi heildarkostnaðar við að koma lyfi á markað. Fastur kostnaður var aðskilinn þar sem ekki var hægt að skipta föstum kostnaði Abbvie niður á eitt tiltekið líftæknilyf með raunhæfum hætti og þar með var hámarks innri ávöxtunarkrafa fundin. Rannsóknir sýndu fram á erfiðleika við notkun CAPM líkansins þegar útreikningur átti sér stað í tilfelli Alvotech. Ástæða þessara erfiðleika voru að fyrirtækið er ekki skráð á hlutabréfamarkað, þar af leiðandi þurfti að notast við gagnasafn sem innihélt tölur sem sýndu meðaltal fyrirtækja innan líftækniiðnaðarins. Erfiðleikarnir gerðu það að verkum að niðurstöður við útreikning á ávöxtunarkröfu Alvotech urðu ónákvæmar. Í tilfelli einkaleyfis og fyrningu þess, þá sýndu tölur fram á að hámarks innri ávöxtunarkrafa Abbvie var verulega mikil og nam nokkrum þúsund prósentum. Þar sem fáar rannsóknir á líftæknifyrirtækjum hafa verið gerðar á Íslandi, teljum við þessa rannsókn gefa góða innsýn inn í líftækniiðnaðinn og sýna mikilvægi hans fyrir samfélagið.