,,Það var magnað að sjá breytinguna á þeim'' : niðurstöður úr sértæku hópastarfi í félagsfærni

Abstract

Góð og jákvæð félagsfærni er mikilvægt verkfæri fyrir börn og unglinga sem getur reynst þeim dýrmætt veganesti í lífinu. En það er ekki sjálfgefið að vera með góða félagsfærni og geta einstaklingar alltaf bætt sig. Það er hægt að setja þetta í svipaða merkingu og með líkamann, líkaminn þarfnast reglulegrar hreyfingar til þess að haldast heilbrigður og andlega hliðin þarfnast þess sama. Þar af leiðandi er mikilvægt fyrir börn og unglinga að æfa sig í félagsfærni og félagslegum aðstæðum. Þessi ritgerð er lokaverkefni til BA gráðu í tómstunda- og félagsmálafræði. Markmið ritgerðarinnar er að varpa ljósi á sértækt hópastarf félagsmiðstöðva ásamt mikilvægi samstarfs grunnskóla og félagsmiðstöðva. Sértækt hópastarf var sett fram sem örnámskeið í félagsfærni þar sem áhersla var lögð á einstaklingsvinnu en jafnframt verið að efla hópinn. Notast var við rannsóknarspurninguna: Hvernig virkar að nota sértækt hópastarf til að efla félagsfærni unglinga í Mosfellsbæ? Með undirspurningunni: Er samstarf skóla og félagsmiðstöðva mikilvægt þegar kemur að sértæku hópastarfi? Jákvæðar niðurstöður fengust úr viðtölum sem tekin voru við deildarstjóra, kennara og stuðningsfulltrúa en ekki er þó hægt að alhæfa um niðurstöðurnar.