Uppeldi barna með ADHD

Abstract

Undanfarin ár hefur greiningum barna með taugaröskunina athyglisbrest með ofvirkni (ADHD) fjölgað mikið. Einkenni ADHD geta haft hamlandi áhrif á líf barna. Foreldrar gegna lykilhlutverki í lífi barna sinna og skipta aðferðir foreldra í uppeldi barnanna miklu máli. Þar sem einkenni ADHD geta haft hamlandi áhrif á líf barna er mikilvægt að foreldrar hafi vitneskju um þær aðferðir sem gætu dregið úr þessum einkennum og stuðlað að velferð barnanna. Markmið þessarar ritgerðar er að svara rannsóknarspurningunni: Hvernig geta foreldrar barna með ADHD hagað uppeldi með þarfir barnsins í huga og hvaða aðferðir þykja ákjósanlegar til að ná því markmið? Ritgerðin er fræðileg heimildaritgerð þar sem stuðst er við fyrirliggjandi rannsóknir og gögn. Í ritgerðinni er fjallað um ýmsar uppeldisaðferðir sem geta hentað börnum með ADHD. Niðurstöður ritgerðarinnar benda til þess að þær uppeldisaðferðir sem eru ákjósanlegastar eru í grunninn þær sömu og henta börnum sem ekki eru með ADHD. Þar má nefna leiðandi uppeldishætti og meðvitað uppeldi. Það eru þó nokkur atriði sem vert er að hafa í huga í uppeldi barna með ADHD, s.s. þörf fyrir aukna hvatningu, rútínu, tíðari og umfangsminni hrós ásamt auknum stuðningi foreldra við félags- og tilfinningafærni barna sinna.