Esja : greinagerð um barnabók

Abstract

Markmið þessarar ritgerðar er að greina frá mikilvægi þess að fræða einhverf börn um sína eigin greiningu og skoða hvernig birtingarmyndir einhverfu geta komið fram hjá ólíkum einstaklingum. Verkefnið er tvíþætt, annars vegar barnabókin um Esju sem er átta ára einhverf stelpa og hins vegar greinargerð um fræðilega hluta bókarinnar þar sem er gert grein fyrir einhverfu, birtingarmyndum og meðröskunum hennar. Í greinagerðinni er svarað rannsóknarspurningunni: Af hverju er mikilvægt að fræða einhverf börn um greininguna sína? Notast var við efni úr fyrirliggjandi rannsóknum og fræðibókum um einhverfu. Við gagnaöflun kom í ljós að lítið virðist hafa verið skrifað um ávinning þess að fræða einstaklinginn á viðeigandi hátt um leið og hann fær sína greiningu. Þær fáu rannsóknir sem hafa verið gerðar sýna fram á að fullorðnir einhverfir einstaklingar hefðu viljað hafa meira fræðsluefni fyrir sig og foreldra sína á bernskuárunum. Það má ætla að það sé mikilvægt að barn þekki einkenni einhverfunnar svo að það upplifi sig ekki eitt og geti lært betur inn á sjálft sig og sína greiningu. Það má því álykta um að skoða þurfi betur ávinning þess að fá upplýsingar um eigin greiningu og efla megi útgáfu á fræðsluefni fyrir börn um einhverfu sem gæti verið þróað í samvinnu við börnin.