Félagsfærni og klípusögur

Abstract

Greinargerð sem hér fer á eftir ásamt efnisvefnum Félagsfærni og klípusögur á vefslóðinni https://sites.google.com/view/felagsfaerni/heim er lokaverkefni okkar til B.Ed.-prófs í grunnskólakennslu yngri barna frá Háskóla Íslands. Greinargerðin fylgir úr hlaði efnisvefnum, sem ætlaður er grunnskólakennurum á yngsta stigi grunnskóla, og lýsir hugmyndum að baki honum. Hún fjallar um mikilvægi félagsfærni og lífsleikni í fræðilegu ljósi og lýsir því hvað felst í félagsfærni og lífsleikni sem viðfangsefnum í grunnskóla. Útlistað er hvernig vinna má með börnum hverju fyrir sig og í hópum, hvernig nota má klípusögur til þess að efla börnin í félagsfærni og auðvelda þeim að takast á við lífið. Verkefnið spratt af reynslu höfunda eftir að hafa kennt með námi einn vetur í grunnskóla. Höfundum varð ljóst að það getur verið snúið fyrir önnum kafna og nýbakaða kennara í grunnskóla að finna til eða útbúa fjölbreytt efni til nota í kennslu í lífsleikni og fannst tilvalið að reyna að bæta úr því.