Tómstundir út lífið : vefsíða með hugmyndum að tómstundum fyrir aldraða

Abstract

Lokaverkefni þetta samanstendur af greinargerð og vefsíðunni ”Tómstundir út lífið”. Ástæða þess að þetta lokaverkefni varð fyrir valinu er sú að engin sambærileg vefsíða virðist vera aðgengileg á íslensku þrátt fyrir þörf þar á. Tómstundir og félagsstarf fyrirbyggja félagslega einangrun, minnka líkur á þunglyndi, viðhalda færni og geta snúið við ótímabærum einkennum öldrunar. Það er öllum mikilvægt að geta sinnt tómstundum í frítíma sínum og fáir sem hafa jafn mikið af honum og eldri borgarar. Því er það nauðsynlegt að geta boðið upp á fjölbreytta og gagnlega afþreyingu til að efla frítíma þeirra. Ein af hindrunum í tómstundastarfi aldraðra er skortur á aðgengilegu efni og hugmyndum, eins vill það oft bera við að starfsfólk í tómstundastarfi aldraðra er ómenntað á því sviði. Því er gott aðgengi að fjölbreyttum tómstunda hugmyndum með fræðilegan bakgrunn mikilvægt fyrir starfið. Verkefnunum á vefsíðunni verður skipt niður í þrjá flokka, góða, miðlungs og skerta færni, og mun ég leggja sérstaka áherslu á tómstundir fyrir heilabilaða. Þær tómstundir og sú fræðsla sem fram kemur á vefsíðunni er til að mynda fengið úr fræðibókum og rannsóknum á tómstundum aldraðra, af vefsíðu Alzheimer samtaka Íslands og sambærilegra vefsíða erlendis, ásamt eigin hugmyndum. Þá voru tekin viðtöl við tvo starfsmenn sem vinna við tómstundir aldraðra á hjúkrunarheimilum til að fá betri sýn á það starf sem þar er í boði. Þar kom fram að þörfin fyrir þetta verkefni er mikil. Það er því ósk mín að geta bætt úr þessum skorti og á þann hátt bætt hag og frítíma eldri borgara.