Leiklist sem kennsluaðferð : samþætting námsgreina

Abstract

Markmið þessa lokaverkefnis er að sýna fram á hversu mikilvæg leiklistarkennsla er og möguleika leiklistar í samþættingu námsgreina. Í aðalnámskrá stendur að allir nemendur hafa rétt á kennslu í leiklist. Þar er einnig rætt um samþættingu námsgreina. Í samþættingu námsgreina skiptir máli að kennarar ræði sín á milli um nálgun og útfærslu kennslunnar. Það leiðir til faglegra leiða og lausna og eykur skilning nemenda á hvernig námsefni og listsköpun geta verið samofin heild. Í þrjátíu ár hef ég unnið með aðferðina um samþættingu námsgreina við leiklist á ýmsum skólastigum. Aðferðin hefur reynst gefandi og er nátengd hugmyndinni um opinn skóla, sem leggur áherslu á frelsi nemenda og að þeir hafi val um hvað þeir gera, hvernig og hvenær. Í skólastarfi gagnast leikur í kennslu sem getur aukið þroska, skilning og félagsfærni. Skólastarf ætti að mínu mati að efla alhliða þroska nemenda og bjóða þeim að nálgast námsefnið við hæfi hvers og eins á þann hátt að þekking, leikni og hæfni sitji eftir.