„Ég held að stjórnendaþjálfun sé í raun bara sjálfsvinna og því mjög mikilvægt fyrir alla að skoða sjálfan sig í gagnrýnu ljósi”. Viðhorf stjórnenda til stjórnendaþjálfunar

Abstract

Hlutverk stjórnenda hafa tekið miklum breytingum undanfarna áratugi og er óhætt að segja að hlutverk stjórnanda í dag er ekki svo auðvelt viðureigna. Nýjar áherslur og hugmyndir eru sífellt að koma upp á yfirborðið og alltaf er eitthvað nýtt sem kallar á athygli stjórnenda og gerir þeim því erfitt fyrir að einbeita sér að einu verkefni í einu. Tilgangur rannsóknarinnar var að skoða viðhorf stjórnenda til stjórnendaþjálfunar og athuga hvort forsenda væri fyrir innleiðingu á stjórnendaþjálfun hjá fyrirtækjum. Fræðilegur bakgrunnur er aðallega sóttur til erlendra rannsókna og greina sem tengjast stjórnendum, leiðtogamennsku og stjórnendaþjálfun. Markmið þessar rannsóknar var því að auka þekkingu á stjórnendaþjálfun með því að skoða viðhorf og reynslu stjórnenda sem hafa sjálfir nýtt sér stjórnendaþjálfun. Eigindleg rannsóknaraðferð var notuð þar sem tekin voru viðtöl við níu stjórnendur sem höfðu reynslu af stjórnendaþjálfun og gátu því myndað sér skýra skoðun um þessi mál. Helstu niðurstöður rannsóknarinnar gáfu til kynna að viðhorf stjórnendana til stjórnendaþjálfunar var gott þar sem afgerandi meirihluti viðmælenda töldu þjálfunina hafa skilað sér nýrri þekkingu eða gefið skarpari mynd af nú þegar hlotinni þekkingu. Þá var hægt að álykta að góð forsenda væri fyrir því að innleiða stjórnendaþjálfun í fyrirtæki þar sem hún gæfi stjórnendum kost á verkfærum og aðferðum til þess að verða góður leiðtogi fyrir starfsmenn sína sem og þjálfunin gæti eflt þá í að vera fljótari að aðlagast síbreytilegum markaði og aðstæðum sem henta vel við aðstæður stjórnenda okkar.