„Þær fylla upp í svo mörg skúmaskot“: Pottaplöntur og fólkið sem safnar þeim

Abstract

Þessi ritgerð fjallar um fólk sem safnar og hefur áhuga á pottaplöntum. Notast var við eigindlega rannsóknaraðferð og byggir hún á viðtölum við fimm einstaklinga sem eiga þetta sameiginlega áhugamál. Þeir viðmælendur sem rætt var við ólust öll upp við plöntur á heimili sínu og eignuðust sjálf plöntur á fullorðins árum. Lagt var upp með að leita svara við því hvers vegna fólk safnar pottaplöntum og hvaða áhrif plöntusöfnun hefur á þessa einstaklinga. Pottaplöntur gegna margvíslegum hlutverkum bæði í lífi jafnt sem á heimilum einstaklinga og eru meðal annars notaðar til að skreyta heimilið. Pottaplöntur geta einnig verið notaðar til að búa til rútínu í lífi einstaklinga og upplifa þeir misjafnar tilfinningar til ákveðna platna. Einstaklingar sem safna plöntum og vilja sinna áhugamálinu þurfa að gefa sér tíma til að læra um umhirðu plantna. Þannig öðlast þeir þekkingu og reynslu og geta hugsað vel um plönturnar sínar. Viðmælendur tilheyra ákveðnum hópi þar sem þau deila sama áhugamáli og verða frásagnir þeirra teknar til greiningar í þessari ritgerð útfrá hugtökum og kenningum í þjóðfræði.