Íslenskur þorskur og lax á frönskum markaði: Reynsla útflytjenda af fisksölu í Frakklandi

Abstract

Rannsóknarritgerð þessi fjallar um ferskan íslenskan útfluttan þorsk og lax á frönskum markaði. Markmiðið með henni var að kanna reynslu og upplifun útflytjenda á útflutningi og sölu á fiskinum frá Íslandi, mögulegri sóun hans í virðiskeðjunni og viðhorf til þátta sem eru í brennidepli nú svo sem kolefnisfótspors, sjálfbærni, uppruna og gæða hráefnis. Rannsóknarspurningin var: Hver er reynsla íslenskra útflytjenda af sölu íslensks hvítfisks eða lax til Frakklands og mögulegri sóun hans í virðiskeðjunni? Rannsókninni var ætlað að safna upplýsingum um franskan markað og koma auga á tækifæri í verðmætaaukningu við núverandi markaðsaðstæður á sölu á ferskum íslenskum þorski og laxi.Niðurstöðurnar sýna fram á að franskur markaður er mjög mikilvægur fyrir íslenskan útflutning á ferskum þorski og laxi en jafnframt mjög breytilegur markaður þar sem samkeppni er nokkuð harðari en víða annars staðar. Viðmælendur sjá vannýtt tækifæri við sölu á ferskum fiski í Frakklandi og telja ákveðið virðistap eiga sér stað við núverandi aðstæður sem koma megi í veg fyrir að einhverju leyti með betri innsýn í áhrifaþætti markaðarins, markvissri markaðssetningu og sölustarfi á franskri grundu. Lykilorð: Þorskur, lax, ferskur fiskur, útflutningur, viðskipti, Ísland, Frakkland.