Íslenska frá A til Ö. Um kennslubók í íslensku sem öðru máli

Abstract

Eftirfarandi ritgerð er lokaverkefni til BA-prófs í íslensku sem öðru máli við Hugvísindasvið Háskóla Íslands. Tilgangur hennar er að gefa yfirsýn yfir bókina Íslenska frá A til Ö − Handbók um íslensku sem annað mál sem er í smíðum. Sú ritgerðarspurning sem ég leitast við að svara er hvers konar bók þetta er og hverjum hún er ætluð. Ritgerðin skiptist í sex kafla. Í þeim fyrsta er inngangsorðum og efni ritgerðar lýst í stuttu máli. Í öðrum kafla verður dregið saman það helsta um hvernig bókin varð til. Kafli þrjú gefur yfirlit yfir samevrópska viðmiðunarrammann fyrir erlend tungumál og framhaldsnámsskrána í íslensku fyrir útlendinga. Fjórði kafli fjallar um hámarksfjölda kennslustunda í íslensku sem öðru máli í ýmsum tungumálaskólum á Íslandi. Í kafla fimm verður athyglinni beint að því hvers konar bók þetta er og til hverra hún höfðar. Einnig verða skoðuð brot úr bókinni. Að því viðbættu verður horft til framtíðar með tilliti til næstu skrefa í gerð kennslubókarinnar. Auk þess verður rætt á gagnrýninn hátt og komið með tillögur um það sem betur mætti fara í innflytjendamálum á Íslandi. Í lokakaflanum verða svo mikilvægustu atriðin dregin saman.