Bein og óbein mæling á þankaþörf

Abstract

Þankaþarfakvarði (Need for cognition scale) Cacioppo og Petty (1982) var þýddur yfir á íslensku og beinar og óbeinar mælingar á þankaþörf bornar saman. Tengsl þankaþarfar við mat á mismunandi spilaverkefnum voru einnig athuguð til þess að sýna fram á hugsmíðaréttmæti kvarðans. Þátttakendur voru 87 háskólanemar og þreyttu þeir tölvupróf sem skiptist í þrennt: beina mælingu á þankaþörf, spilaverkefni og mat á því og óbeina mælingu á þankaþörf. Þáttagreining á Þankaþarfakvarðanum gaf þrjá þætti og karlar höfðu meiri þankaþörf en konur. Þessar niðurstöður eru í ósamræmi við erlendar rannsóknir. Búist var við að þeir sem höfðu mikla þankaþörf myndu njóta þess meira að leysa erfitt spilaverkefni heldur en þeir sem voru lágir á þankaþörf. Einnig var búist við að þeir sem væru háir á þankaþörf ættu erfiðara með að para orð sem tengjast mikilli þankaþörf við neikvæð orð í samanburði við þá sem eru lágir á þankaþörf. Þessar tilgátur stóðust ekki, líklega vegna skekkju í úrtaki.