Kortlagning nýsköpunarfyrirtækja í sjávarútvegi á Íslandi og kyn æðstu stjórnenda þeirra

Abstract

Undanfarin ár hafa áhyggjur mannsins af ofnýtingu auðlinda hafsins orðið til þess að mikil gróska hefur átt sér stað í nýsköpun tengdri hafinu og þá sérstaklega hér á landi. Samhliða þessari þróun hefur umræðan um jafnrétti kynjanna á vinnumarkaðinum aukist. Markmið þessarar ritgerðar var að finna þau fyrirtæki sem stunda nýsköpun tengda sjávarútveginum á Íslandi og kortleggja, ásamt því að skoða stöðu kvenna innan þeirra með tilliti til kynjaskiptingu æðstu stjórnenda og bera saman við kynjaskiptingu æðstu stjórnenda í sjávarútveginum heilt yfir. Sjávarútvegurinn hefur alltaf þótt karllæg atvinnugrein og kynjaskipting meðal æðstu stjórnenda innan hans er enn frekar ójöfn. Í þessari rannsókn var gögnum aflað í gegnum vefsíður fyrirtækja og í samskiptum við starfsmenn eftir því sem þurfti. Helstu niðurstöður leiddu í ljós að það eru að minnsta kosti 71 fyrirtæki sem stunda nýsköpun tengda sjávarútveginum á Íslandi, flest þeirra starfa í tæknilausnum og líftækni og stór meirihluti þeirra er staðsettur á höfuðborgarsvæðinu. Þá sýndu niðurstöður einnig að konur eru í minnihluta sem æðstu stjórnendur þessara fyrirtækja eða 27%, en þó hlutfallslega fleiri en í sjávarútvegi almennt. Eins eru konur í meirihluta í fyrirtækjum tengdum fæðubótarefnum og til jafns við karlmenn í líftæknifyrirtækjum. Loks mátti sjá að því yngri sem fyrirtækin eru, því hærra verður hlutfall kvenna í æðstu stjórn. Ljóst er að jafnrétti kynjanna er ekki enn náð en útlit er fyrir að þróunin sé á réttri leið.