Hvað er Agile og hvaða verkfæri falla þar undir? Kostir og gallar Agile.

Abstract

Agile hugmyndafræðin kemur á sjónarsviðið árið 2001 þar sem reyndir menn úr hugbúnaðariðnaðinum í Bandaríkjunum voru komnir með nóg af eldri aðferðum til að þróa hugbúnað, eins og t.d. fossamódelinu. Í sameiningu gáfu þeir út Agile stefnuyfirlýsinguna. Agile stefnan hefur öðlast vinsældir fyrir sveigjanleika og aðlögunarhæfni og eru verkfærin undir henni notuð á mörgum sviðum í dag og einskorðast ekki lengur við hugbúnaðarþróun. Markmið þessarar ritgerðar er að skoða Agile hugmyndafræðina, kosti hennar og galla. Einnig verða skoðuð þau verkfæri sem falla undir hana og hafa notið vinsælda í teymisvinnu.Scrum ramminn er gífurlega vinsælt Agile verkfæri og er mikið notaður í þróun á hugbúnaði. Farið verður yfir kosti og galla hans og hvað þarf til að fylgja Scrum rammanum frá byrjun til enda.Kanban kerfið fellur mitt á milli Agile og Straumlínustjórnunar (e. Lean) og því verður það skoðað þar sem það hefur verið til lengi enda fyrst tekið upp af Toyota snemma á fimmta áratug síðustu aldar. Kanban getur því talist sem undanfari Agile og Scrum og er búið að þróast frá því að vera eingöngu notað í framleiðsluiðnaði yfir í hugbúnaðarvinnu og hugmyndavinnu.Agile hugmyndafræðin kom út til að hjálpa litlum teymum við að vinna flókin verkefni. Svo í seinni tíð þegar skipulagsheildir vildu víkka út Agile um alla skipulagsheildina komu fram útvíkkaðar Agile aðferðir (e. Agile at scale) og verða þær teknar fyrir. Einnig verður farið yfir kosti og galla við að innleiða þessar aðferðir.