Um virkan rétt til viðurkenningar á faglegri menntun og hæfi. Réttur launþega til frjálsrar farar, staðfesturéttur og rétturinn til að veita þjónustu á innri markaði Evrópska efnahagssvæðisins.

Abstract

Ritgerðin fjallar um gagnkvæma viðurkenningu á menntun og prófskírteinum samanber tilskipanir Evrópusambandsins um það efni. Fjallað er um grundvallarréttindi Rómarsáttmálans um frjálsa för launafólks, staðfesturétt og þjónustufrelsi en tilskipanir um gagnkvæma viðurkenningu prófskírteina eru settar á vettvangi Evrópusambandsins í þeim tilgangi að draga úr hindrunum á frjálsri för fólks á innri markaði sambandsins. Ísland er aðili að innri markaði Evrópusambandsins á grundvelli EES-samningsins og er því skoðað hvort rétturinn til viðurkenningar á prófskírteinum sé virkur í raun hér á landi í ljósi dómafordæma Evrópudómstólsins.