Konan og vaktirnar þrjár: Greining á kynjaskiptingu einkasviðsins og áhrifum hennar á opinbera sviðið

Abstract

Í þessari heimildaritgerð var leitast við að greina frá kynjaskiptingu annarrar og þriðju vaktarinnar hjá gagnkynhneigðum pörum, skoða áhrif hennar á vinnumarkaðinn, setja hana í sögulegt samhengi og sjá hvernig hún birtist í dag. Ljóst er að þrátt fyrir aukna þátttöku karla á annarri vaktinni er enn margt ábótavant í þeim efnum. Þrátt fyrir að konur séu næstum farnar að starfa á vinnumarkaðnum til jafns við karla viðhelst enn ójöfn verkaskipting inni á heimilunum þar sem konur sjá enn um aðra vaktina í meiri mæli en karlar. Þegar kemur að þriðju vaktinni viðgengst enn meiri kynjaskipting þar sem hún er mestmegnis á herðum kvenna. Slík misskipting getur haft áhrif á andlega líðan mæðra sem og framgang þeirra í atvinnulífinu. Kynjaskipting heimilisstarfanna er því rótgróið og langvarandi vandamál sem er viðhaldið í gegnum menninguna og hefur ýmis konar áhrif á opinbera sviðið. Þrátt fyrir mikla vitundarvakningu innan samfélagsins um málefni annarrar og þriðju vaktarinnar er enn fleiri rannsókna þörf til að auka þekkingu fræðasamfélagsins sem og almennings.