Seðlabankarafeyrir. Möguleg áhrif innleiðingar á viðskiptabanka, fjármálastöðugleika og peningastefnu

Abstract

Í þessu lokaverkefni verður fjallað um innleiðingu seðlabankarafeyris og áhrifin sem notkun hans getur haft í för með sér, einkum hvernig innleiðing mun geta haft áhrif á íslenska fjármálakerfið. Mikilvægi þess að einstaklingar hafi aðgengi að traustum peningum hefur leitt til sérstöðu seðlabanka á greiðslumiðlunarmörkuðum. Tæknivæðingin hefur verið mikil undanfarin ár og áratugi, þá sérstaklega á fjármálamörkuðum. Nýjar leiðir til greiðslumiðlunar hafa boðist einstaklingum vegna tilkomu rafeyris og hefur það haft í för með sér dvínandi þörf fyrir notkun reiðufjár. Staða seðlabanka er að breytast hratt og hlutverk þeirra að tryggja traustan löggjaldmiðil verður sífellt erfiðara með þessari samkeppni. Til að halda í við samkeppnina hafa seðlabankar um allan heim rætt innleiðingu á seðlabankarafeyri. Seðlabanki Íslands er þar ekki undanskilinn, en þar hefur hugmyndin um rafkrónu komið upp á yfirborðið.