Viðhald eða ögrun orðræðunnar? Birtingarmynd umfjöllunar fjölmiðla um kynferðisofbeldi

Abstract

Umræðan um kynferðisofbeldi hefur á síðustu árum orðið meira og meira áberandi. Fjölmiðlar gegna þar mikilvægu hlutverki vegna þess að þeir geta haft gríðarleg áhrif á mótun umræðunnar með umfjöllun sinni. Í umfjöllun sinni geta fjölmiðlar stutt við eða ögrað ríkjandi orðræðu samfélagsins og haft mikið um það að segja hvernig hún þróast. Því er markmið þessa verkefnis að greina þá orðræðu sem fjölmiðlar notast við í umfjöllun sinni um kynferðisofbeldi. Með slíkri greiningu er mögulegt að greina hvort fjölmiðlar styðjist við eða ögri ríkjandi hugmyndum og orðræðu samfélagsins. Lagt var upp með að greina fjögur sjónvarpsviðtöl sem tekin voru við þolendur og meinta gerendur kynferðisofbeldis. Þær rannsóknarspurningar sem leitast var við að svara voru: Hver er birtingarmynd orðræðu um kynferðisofbeldi í fjölmiðlum á Íslandi og Hvernig er innrömmun fjölmiðla á viðtölum við þolendur og meinta gerendur háttað? Niðurstöður greiningarinnar leiddu í ljós að greinileg átök eru til staðar þegar kemur að tilteknum þáttum orðræðunnar um kynferðisofbeldi, en að samþykkt ríki um aðra þætti hennar.