Fjárfestingar Vátryggingafélags Íslands hf.: Umgjörð, staða og áhrif

Abstract

Ritgerð þessi fjallar um fjárfestingar Vátryggingafélags Íslands hf. Umfjöllunin snýr að miklu leyti að umgjörð fjárfestinga félagsins þar sem meðal annars er gerð grein fyrir umfangi íslenska tryggingamarkaðarins og því regluverki sem hérlendum tryggingafélögum ber lagaleg skylda til að vinna eftir. Ásamt því er fjallað um þau áhrif sem fjárfestingar félagsins hafa í för með sér. Mat á umfangi íslenskrar tryggingastarfsemi leiðir í ljós lítil áhrif tryggingafélaga og fjárfestinga þeirra á hagkerfið. Með samanburði á stærð íslenska lífeyriskerfisins og tryggingafélaga má sjá gríðarlegan mun á stærð þeirra á markaði. Þó má segja að ásamt öðrum stofnanafjárfestum stuðli fjárfestingar VÍS að heilbrigði íslenska fjármálakerfisins ásamt því að ýta meðal annars undir aukinn hagvöxt og fjármálastöðugleika, sterkari samkeppnisstöðu og minna atvinnuleysi. Út frá fjárfestingum VÍS gætir jákvæðra áhrifa en með þeim örvar félagið efnahagslífið með beinum og óbeinum hætti. Þar má meðal annars nefna eflingu skilvirks verðbréfamarkaðar ásamt auknum atvinnutækifærum og nýsköpun. Eitt og sér hefur félagið þó ekki stórtæk áhrif í íslenska hagkerfinu.