Birtingarmyndir ofbeldis á Íslandi: Hafa þolmörk einstaklinga gagnvart ofbeldi breyst á Íslandi?

Abstract

Markmið rannsóknarinnar er að gera grein fyrir ofbeldi á Íslandi og hvernig það hefur breyst í gegnum aldirnar. Í ritgerðinni er rannsakað hvort þolmörk einstaklinga fyrir ofbeldi hafi breyst hér á landi og ef svo er, hvað varð til þess. Í þeim tilgangi að fá nánari sýn á hvernig ofbeldi var á Íslandi á öldum áður eru almenn hegningarlög handa Íslandi frá árinu 1869 skoðuð og þau borin saman við núgildandi hegningarlög nr. 19/1944. Hér er að ræða 144 ára bil á milli löggjafanna tveggja og má því fá skýra innsýn inn í hug löggjafans varðandi það hvað taldist til ofbeldis þá og hvað það telst í dag.Rannsóknin skiptist í fimm kafla. Í fyrsta kafla er fjallað um bakgrunn viðfangsefnisins, þar sem helstu hugtök og kenningar sem snúa að ofbeldi eru teknar fyrir. Í öðrum kafla er fjallað um ofbeldi á Íslandi á 19. og 20. öld en þar er farið yfir hegningarlög handa Íslandi árið 1869. Ásamt því verða frásagnir fólks sem urðu fyrir ofbeldi gerð skil og fjallað sérstaklega um það ofbeldi sem börn, konur, karlar og hinsegin einstaklingar urðu fyrir. Í þriðja kafla er fjallað um ofbeldi á Íslandi í samtímanum með hliðsjón af núgildandi almennum hegningarlögum nr. 19/1944. Þá verður meðal annars farið yfir ýmsar rannsóknir sem gerðar hafa verið á Íslandi um ofbeldi sem börn, konur, karlar og hinsegin einstaklingar hafa orðið fyrir. Í fjórða kafla ræðir höfundur niðurstöður rannsóknarinnar sem svo verða dregnar saman í fimmta og seinasta kafla og rannsóknarspurningunni svarað.