Færar í flestan sjó. Upplifun kvenna af áhrifum sjósunds á heilsu

Abstract

Þessi ritgerð fjallar um upplifun kvenna af áhrifum sjósunds á heilsu þeirra. Notuð var eigindleg rannsóknaraðferð og viðtöl tekin við fjórar konur sem stunda sjóböð og/eða sjósund að staðaldri, árið um kring. Ritgerðin er byggð upp út frá skilgreiningu Alþjóðaheilbrigðisstofnunarinnar á heilsu þar sem heilsa er flokkuð sem andleg, líkamleg og félagsleg vellíðan. Niðurstöður rannsóknarinnar sýna að upplifun kvennanna er afgerandi en allar upplifa þær gríðarlega jákvæð áhrif á heilsu sína að öllu leyti; líkamlega, andlega, og félagslega. Konurnar upplifa almennt betri andlega heilsu við sjósundiðkun, minni kvíða og léttari lund. Þær upplifa einnig líkama sinn hraustari og að þær öðlist betri líkamsmeðvitund. Þá upplifa þær að sjósund sé valdeflandi og að sjósundsamfélagið sé umvefjandi þar sem allir séu velkomnir. Upplifun kvennanna er sett í þjóðfræðilegt samhengi með hugtökunum hrif, hópur, hópkennd, flæði, núvitund og veraldlegt jaðarástand.