Maður er manns gaman - Miðlunaráhrif félagslegra samskipta á samband hreyfingar og andlegrar heilsu aldraðra

Abstract

Rannsóknir hafa sýnt að hreyfing og félagsleg virkni hefur góð áhrif á andlega heilsu. Þetta á við aldraða líkt og aðra. Þó hefur lítið verið skoðað hvernig þessar þrjár breytur virka saman. Health and Retirement Study (HRS) er Bandarísk rannsókn sem hefur safnað gögnum um árabil um líkamlega-, félagslega- og andlega þætti, fjölskylduhagi, menntun, atvinnu, vana og venjur aldraða Bandaríkjamanna. Hér voru valdar breytur úr gagnabanka HRS til þess að varpa ljósi á og gerð tilraun til að magnbinda andlega heilsu, líkamlega hreyfingu og félagsleg samskipti. Markmiðin með þessari rannsókn voru þrjú. Í fyrsta lagi að staðfesta samband hreyfingar og andlegrar heilsu. Í öðru lagi að staðfesta samband félagslegra samskipta og andlegrar heilsu. Svo að lokum að skoða hvort og hvernig félagsleg samskipti hafi áhrif á samband hreyfingar og andlegrar heilsu. Áætlað var að þegar tekið er tillit til félagslegra samskipta verði samband hreyfingar og andlegrar heilsu veikara. Þetta var athugað með aðhvarfsgreiningu og var stjórnað fyrir bakgrunnsbreytunum aldur, kyn, menntun, staða á vinnumarkaði, reykingar og lotudrykkja. Í ljós kom að vissulega hafði hreyfing og félagsleg samskipti jákvæð áhrif á andlega heilsu. Hins vegar stóðst tilgátan um að félagsleg samskipti hafi miðlunaráhrif á samband hreyfingar og andlegrar heilsu ekki. Það er þó ljóst að efla ætti félagsleg samskipti og hreyfingu þegar kemur að því að stuðla að andlegri heilsu aldraðra.