Fabrizio De André: Hólpnar sálir

Abstract

Í þessari ritgerð er fjallað um söngvaskáldið Fabrizio De André. Gerð er grein fyrir lífsskoðunum Fabrizio eins og þær birtast í verkum hans. Lagt er út af greiningu á textum söngvaskáldsins og hún fléttuð inn í umræðu ítalskra blaðamanna, rithöfunda og tónlistargagnrýnenda.Fabrizio tilheyrði kynslóð söngvaskálda frá Genúa á Ítalíu sem áttu það sameiginlegt að hafa hleypt nýjum straumum inn í ítalska dægurlagamenningu um og eftir 1960. Hann söng um ýmsar hliðar ítalsks samfélags sem fram að þeim tíma höfðu ekki orðið öðrum tónlistarmönnum að yrkisefni. Hann deildi á vald og misbeitingu þess með því að ljá undirmálsfólki rödd í textum sínum. Ýmsir minnihlutahópar sem áður voru á jaðri samfélagsins urðu þannig sýnilegir og gjaldgengir í orðræðunni. Textar Fabrizio höfðu mikil áhrif á ítalskt samfélag, ekki síst fyrir þá sem synda á móti straumnum. Í þeim endurspeglast sú trú að allar manneskjur, fyrir tilstilli sammannlegra þátta, hafi sinn tilvistarrétt, óháð því hlutskipti sem lífið hefur búið þeim.