Áhrif Covid-19 á heilbrigðisstarfsfólk - Aukning einkenna streitu, kulnunar og örmögnunar?

Abstract

Markmið þessarar ritgerðar er að skoða áhrif Covid-19 á streitu og örmögnun heilbrigðisstarfsfólks sem og skoða hvaða íhlutanir og forvarnir eru til gagnvart því. Covid-19 faraldurinn breiddist hratt út í byrjun ársins 2020 og hafði mikil áhrif á heilbrigðisstofnanir heimsins. Í byrjun faraldursins voru gerðar margar rannsóknir í Kína í þeim tilgangi að skoða streitu, kulnun, langtímastreitu og örmögnun á meðal heilbrigðisstarfsfólks. Þar kom í ljós að einkenni streitu, kulnunar og annarra andlegra kvilla jukust töluvert á tímum faraldursins miðað við fyrri ár. Það hafa verið gerðar ýmsar rannsóknir á tímum fyrir faraldurinn sem skoða hvaða leiðir er hægt að fara til þess að hjálpa heilbrigðisstarfsfólki sem þjáist af streitu, kulnun og örmögnun og eru helstu leiðir að bjóða upp á sálfræðiþjónustu, aukinn stuðning við starfsfólkið og skýrari samskipti. Það vantar hins vegar fleiri rannsóknir til að skoða forvarnir í formi fyrirbyggjandi aðgerða í þeim tilgangi að koma í veg fyrir að ýmis einkenni streitu sem geta komið upp í miklum álagsaðstæðum, þróist í langvarandi streitueinkenni og jafnvel þróun kulnunar og örmögnunar. Í náinni framtíð væri einnig áhugavert að skoða hvort heilbrigðisstarfsfólk þrói með sér mikil einkenni örmögnar, jafnvel svokallað „örmögnunar ástand“ (Vital Exhaustion) eftir að hafa verið undir miklu álagi í Covid-19 faraldrinum og setja fram langtímarannsóknir til að skoða áhrif heimsfaraldursins.