Gott ofbeldi : getur ofbeldi Fedru í Ást Fedru eftir Söruh Kane knúið fram jákvæðar samfélagslegar breytingar?

Abstract

Þessi ritgerð er greining á sögupersónunni Fedru, þá sérstaklega í verki Söruh Kane Ást Fedru. Fedra er hér rannsökuð sem ofbeldiskona og hennar gjörðir teknar til athugunar í samhengi við femínískar kenningar. Í fyrsta hluta ritgerðarinnar er farið yfir sögu Fedru í verkunum Hippolítosi eftir Evrípedes, Fedru eftir Jean Racine og að lokum Ást Fedru en Fedra innan þess verks er hér aðalatriði. Þar af leiðandi er annar hluti ritgerðarinnar nýttur í ítarlega greiningu á ofbeldi af hendi Fedru gagnvart öðrum í verkinu og hvaða áhrif það hefur á áhorfendur. Til þess eru notaðar kenningar Juliu Kristevu um úrkast (e. abject). Þriðji og síðasti hluti ritgerðarinnar fjallar um hættuna sem stafar af konum og hvernig nota megi Ást Fedru og svo Fedru sjálfa sem samfélagslegt tæki til þess að hrinda breytingum af stað innan samfélagsins. Til þess er stuðst við aðferðafræði og kenningar José Esteban Munoz um kennsl óháð samfélagslegri hugmyndafræði (e. disidentification). Fedra hefur í gegnum tíðina verið ofbeldiskona sem ekki hefur verið fær um að taka ábyrgð á gjörðum sínum. Hér er til rannsóknar hvort Kane hafi tekist með skrifum sínum að mála upp nýja mynd af Fedru sem kvenkyns illmenni án þeirra afsakana sem feðraveldið krefst til þess að hægt sé að skilgreina hana sem viðfang.