Katla : greinargerð um barnabók sem forvörn gegn einelti leikskólabarna á aldrinum þriggja til sex ára

Abstract

Of mörg börn verða fyrir einelti og benda rannsóknir til þess að einelti meðal leikskólabarna sé orðið vandamál, einnig vísa þær í mikilvægi þess að huga þurfi að samskiptum og stöðu barna í hóp strax á leikskólaaldri. Lokaverkefni þetta samanstendur af fræðilegri greinargerð auk barnabókarinnar Katla sem er ætluð börnum á aldrinum þriggja til sex ára. Barnabókin er hugsuð sem forvörn gegn einelti leikskólabarna og er meginmarkmið hennar að auka bæði fræðslu til barna og umræðu um málefnið. Í bókinni má finna umræðuspurningar sem gera lesanda kleift að spyrja nánar út í söguna og þar með skapa innihaldsríkar samræður við börn. Tilgangur umræðuspurninganna er að dýpka innihald sögunnar sem og skilning barna á einelti og vináttu. Í greinargerð er fjallað um skilning barna á vináttu og hvernig einelti birtist meðal barna á leikskólaaldri. Einnig er fjallað um tilfinninga- og félagsþroska barna og dregið fram mikilvægi þess að mynda jafningja- og vinatengsl ásamt því að öðlast þá hæfni að setja sig í spor annarra. Barnabækur stuðla að þroska barna og koma að ýmsu gagni í starfi með börnum. Í lok greinargerðar er gerð grein fyrir hvernig notast megi við barnabókina Kötlu.