Áhrif íþróttaiðkunar á sjálfstraust barna og unglinga

Abstract

Í nútíma samfélagi er almenn þekking um mikilvægi hreyfingar og íþróttaiðkunar fyrir líkamlegt hreysti. Ekki er þó einungis um líkamlega ávinninga að ræða heldur hefur regluleg íþróttaiðkun einnig mikilvæg áhrif á andlega heilsu. Í þessari grein verður leitast við að skoða áhrif íþróttaiðkunar á sjálfstraust barna og ungmenna. Farið verður sérstaklega yfir hvaða áhrif sjálfstraust hefur á einstaklinginn, hvað mótar sjálfstraustið og hvaða leiðir má nota til að efla það. Rannsóknir sem tengjast áhrifum íþróttaiðkunar á sjálfstraust verða skoðaðar. Helstu niðurstöður rannsókna sýna fram á að íþróttaiðkun geti aukið sjálfstraust þeirra einstaklinga sem þær stunda. Jákvætt umhverfi í íþróttum, þar sem einstaklingar fá að takast á við viðeigandi áskoranir miðað við eigin getu, hefur mikilvæg mótandi áhrif á sjálfstraust hjá börnum og ungmennum sem þær stunda. Þannig getur líka neikvætt umhverfi þar sem of mikil pressa er á börn og ungmenni eða þau fá ítrekað verkefni sem er þeim ofviða haft slæm áhrif á sjálfstraust þeirra. Í íþróttaþjálfun hefur fræðsla og hugræn þjálfun á borð við jákvætt sjálfstal og markmiðasetningu nýst vel til að hjálpa einstaklingum að styrkja sitt eigið sjálfstraust.