Ferðumst um Ísland : námsspil í náttúru- og landafræði

Abstract

Námsspilið Ferðumst um Ísland er lokaverkefni Heklu Karenar Steinarsdóttir til B.Ed.-prófs í grunnskólakennarafræðum við Menntavísindasvið Háskóla Íslands. Spilið er ætlað nemendum á miðstigi grunnskóla og er samþætt verkefni um náttúru- og landafræði Íslands. Við gerð spilsins var stuðst við hæfniviðmið Aðalnámskrár grunnskóla (Mennta- og menningarmálaráðuneytið, 2013) og kennslubækur í náttúru- og landafræði sem notaðar eru við kennslu á miðstigi, fræðibókum um Ísland ásamt ritrýndum vefsíðum. Í greinargerð um spilið er fjallað um gildi og notkun námsspila í skólastarfi ásamt því að rýna í rannsóknir sem hafa verið gerðar á námsspilum. Flokkunarkerfi Blooms er skoðað, en var flokkunarkerfið haft til hliðsjónar við gerð spurninganna. Einnig er fjallað um kenningu Vygotskys um félagslega hugsmíðahyggju og áherslur hans á leik þegar kemur að námi, auk þess sem rýnt er í hvernig námsspil tengjast þeim kenningum. Fjallað verður um stefnu yfirvalda varðandi náttúrufræði og landafræði ásamt fyrirmyndum og uppbyggingu námsspilsins Ferðumst um Ísland.Þó að spilið sé fyrst og fremst ætlað til upprifjunar í náttúru- og landafræðinámi getur það einnig verið verkfæri í kennslu við að kynna nýja þekkingu. Spurningar spilsins hafa fræðslu- og kennslugildi með fjölbreytni í erfiðleikastigi til að ýta undir jákvæða styrkingu á þeirri þekkingu sem leikmenn búa þegar yfir. Flokkar spilsins eru níu og lagt er upp með að allir á aldrinum 10-99 ára geti notið þess að spila það, þó það sé einkum ætlað nemendum í 5.–7. bekk grunnskóla.