Könnunaraðferðin sem leið til þess að styðja við lýðræði og vellíðan barna í nútímasamfélagi leikskóla

Abstract

Markmið þessarar ritgerðar er að skoða hvernig hægt er að styðja við lýðræði og vellíðan barna í nútímasamfélagi með könnunaraðferðina að leiðarljósi. Fjallað er um lýðræði í leikskólastarfi, vellíðan barna og mikilvægi þess að veita þeim umhyggju í daglegu starfi í leikskóla þannig að styðja megi við öryggistilfinningu þeirra. Þar er tekið mið af fjölbreyttum menningarlegum bakgrunni barna. Auk þess verður greint frá markmiðum könnunaraðferðarinnar og hvernig megi nýta hana í leikskólastarfi í breyttu nútímasamfélagi. Tilgangurinn er að koma til móts við fjölbreyttan barnahóp þar sem áhersla er á að auka upplýsingagjöf, fræðslu og skilning á bakgrunni hvers og eins. Gagnaöflunin byggir á fræðilegum heimildum og þeim lærdómi sem hefur átt sér stað síðustu ár og við vinnslu B.Ed. lokaverkefnisins. Sú upplýsingaöflun hefur leitt í ljós að með því að skapa öruggt umhverfi fyrir börn í leikskólanum þar sem þeim líður vel og þau fá tækifæri til að láta skoðanir sínar í ljós, eykur það líkur á að nám þeirra skili persónulegum framförum. Könnunaraðferðin styður við nám barna þar sem hún byggir á áhuga þeirra, fyrri reynslu og þekkingu og því getur hún stutt við menntun barna með fjölbreyttan bakgrunn.