Leiddu mína litlu hendi : mikilvægi tengslamyndunar barna við upphaf leikskólagöngu

Abstract

Í þessari ritgerð er fjallað um mikilvægi tengslamyndunar við upphaf leikskólagöngu eða aðlögunar eins og tímabilið er jafnframt kallað innan leikskólans. Hún er samin með leikskólastjórnendur, leikskólastarfsmenn og foreldra barna sem eru að feta sín fyrstu spor í aðlögunarferli í huga. Við gagnaöflun var stuðst við eigindlega aðferðafræði í formi óstaðlaðra einstaklingsviðtala. Viðmælendur voru tveir, annars vegar leikskólastjóri og hins vegar leikskólaliði. Megin þema viðtalanna var upplifun og reynsla þátttakanda af þátttökuaðlögun. Niðurstöður leiddu í ljós að traust, öryggi og það hvernig tekið er á móti börnunum væru mikilvægustu þættirnir í farsælli aðlögun. Það er von mín að með skrifum þessarar ritgerðar verði tímabilið sem markar upphaf leikskólagöngu ungra barna gert hærra undir höfði. Einnig að horft verði til þess mikilvæga þáttar sem tengslamyndun lykilpersónu og barna er. Örugg tengsl er sá þáttur sem vegur þyngst í að börnum líði vel í upphafi leikskólagöngu og því mikilvægt að áhersla sé lögð á stöðugleika í starfsmannahaldi til þess að mæta barninu á þann hátt sem það þarf út frá sínum tengslamynstrum. Það er von mín að ritgerðin geti gagnast öllum þeim sem koma að umönnun barna.